DONATE
שיקט אַ בײַשטײַער

ווער מיר זענען
Who We Are

באַקענט זיך מיטן קאָלעקטיוו בײַ דער ייִדיש־ליגע

עקזעקוטיווע־מיטגלידער און פּערסאָנאַל פֿון כּלערליי פּערזענלעכע און פּראָפֿעסיאָנעלע הינטערגרונטן ווײַזן אַרויס דעם זעלבן ברען פֿאַר דער ייִדישער שפּראַך און פֿאַרן דורכפֿירן די מיסיע פֿון דער ייִדיש־ליגע

עקזעקוטיווע

פּראָפֿעסיאָנעלער פּערסאָנאַל

גיטל שעכטער־ווישוואַנאַט

גיטל שעכטער־ווישוואַנאַט
פֿאָרזיצער פֿון דער עקזעקוטיווע

גיטל שעכטער־װישװאַנאַט איז דער מיט־שעף־רעדאַקטאָר פֿונעם אַרומנעמיק ענגליש־ייִדיש ווערטערבוך און לאַנגיאָריקער סטיל־רעדאַקטאָר פֿון אױפֿן שװעל. זי האָט רעדאַקטירט מרדכי שעכטערס ייִדיש צוויי, צווישן אַנדערע לערנביכער און טערמינאָלאָגישע ווערק. זי איז אַ ייִדישע פּאָעטעסע וואָס האָט זיך געדרוקט אין פֿאַרשידענע ביכער און זשורנאַלן, און אַרויסגעגעבן אַ צוויישפּראַכיקן באַנד לידער, פּלוצעמדיקער רעגן (2003). אירע לידער קען מען הערן אין איר אייגן קול אויף ליריק-לײַן (Lyrik Line). גיטל איז דורכויס איבערגעגעבן דעם אויפֿהאַלט פֿון ייִדיש ווי אַ לעבעדיקע שפּראַך. אירע דרײַ קינדער, און אירע אייניקלעך, רעדן אַ פֿליסיקן ייִדיש.

ד״ר אײַזיק בלימאַן

ד״ר אײַזיק בלימאַן

ד״ר אײַזיק בלימאַן איז אַ געהילף־פּראָפֿעסאָר פֿון לינגװיסטיק בײַם קאַליפֿאָרניער אוניװערסיטעט, בױרקלי, און דער דירעקטאָר פֿונעם „קאָרפּוס פֿון דער ייִדישער שמועסשפּראַך אין אײראָפּע“ (yiddishcorpus.org). זײַנע פֿאָרשונגען באַהאַנדלען פֿאַרשײדענע טעמעס אין דער ייִדישער סאָציאָלינגװיסטיק. ער האָט געקראָגן זײַן דאָקטאָראַט אין לינגװיסטיק פֿון ניו־יאָרקער אוניװערסיטעט אין 2018 און זײַן מאַגיסטער־טיטל אין ייִדיש פֿון אָקספֿאָרדער אוניװערסיטעט אין 2013. ער האָט געאַרבעט װי אַ שפּראַכלערער בײַם ייִװאָ, דעם אַרבעטער־רינג און אױף דער ייִדיש־פֿאַרם. בלימאַן איז אַ מיטגליד פֿון דער עקזעקוטיװע פֿון דער ייִדיש־ליגע און פֿון דער רעדקאָלעגיע פֿון אױפֿן שװעל.

 

מאיר דוד

מאיר דוד

מאיר דוד איז אַ קאָמפּיוטערײַ־ספּעציאַליסט וואָס האָט אויסגעאַרבעט אַוואַנסירט פּראָגראַמוואַרג פֿאַר קינסטלעכער אינטעליגענץ, ווי אויך סיסטעמען צום פֿאַרשטיין די נאַטירלעכע שפּראַך און נײַע טעכנאָלאָגיע פֿאַר דאַטן־באַזעס. ווי דער שלוש פֿון דער עלעקטראָנישער צעשיק־רשימה „דאָס פֿאַרשטיין דאָס פּראָצעסירן ייִדיש־אינפֿאָרמאַציע“ (UYIP), טיילט זיך מאיר מיט רעסורסן וועגן שרײַבן און באַאַרבעטן דעם קאָמפּיוטעריזירטן ייִדישן טעקסט. ער איז דער בעל־הבית און פּראָדוצירער פֿון דער אַלייִדישער וואָכיקער באָסטאָנער ראַדיאָ־פּראָגראַם  „דאָס ייִדישע קול“, וואָס שטעלט פֿאָר מוזיק, פּאָעזיע, קאָמעדיע, אינטערוויוען און נײַעס.



ירמיה־שׂימחה גאַרבער

ירמיה־שׂימחה גאַרבער

ירמיה־שׂימחה גאַרבער איז אַ פּענסיאָנירטער אַדוואָקאַט פֿון לעגאַלער עטיק. אַ רעדאַקטאָר און ייִדישער דערציִער, איז ער דער מיטמחבר פֿון דער הקדמה פֿון „בלוט־בילבול: דאָס לעבן און געשיכטע פֿון מענדל בייליס“ (2011), די ערשטע פֿולשטענדיקע ענגלישע איבערזעצונג פֿון בייליס׳ ייִדישע זכרונות, די געשיכטע פֿון מײַנע ליידן.



ד״ר הערשל גלעזער

ד״ר הערשל גלעזער

ד״ר הערשל גלעזער איז אַ ייִדישער לינגוויסט, לעקסיקאָגראַף און איבערזעצער. ער איז דער מיט־שעף־רעדאַקטאָר פֿונעם אַרומנעמיק ענגליש־ייִדיש ווערטערבוך (2016; 2021), און האָט רעדאַקטירט די ענגלישע איבערזעצונג פֿון מאַקס ווײַנרײַכס געשיכטע פֿון דער ייִדישער שפּראַך (2008). הערשל איז דער געוועזענער דעקאַן פֿונעם צענטער פֿאַר העכערע ייִדישע לימודים בײַם ייִוואָ, און האָט געדינט אויף די רעדקאָלעגיעס פֿון, און זיך געדרוקט אין, אָן אַ שיעור ייִדישע און אַנדערע פּובליקאַציעס אָפּגעגעבן דער ייִדישער שפּראַך.


ד״ר איציק גאָטעסמאַן

ד״ר איציק גאָטעסמאַן

ד״ר איציק גאָטעסמאַן איז אַ גאַסטפֿאָרשער בײַם טעקסאַסער אוניווערסיטעט אין אָסטין. ער האָט אַ דאָקטאָראַט אין פֿאָלקלאָר פֿונעם פּענסילווייניער אוניווערסיטעט און האָט שוין געלערנט ייִדיש סײַ אין פּענסילווייניער אוניווערסיטעט סײַ אין טעקסאַסער אוניווערסיטעט אין אָסטין. ער האַלט אין אויספּלאַנירן אַ וועבזײַט אויף צו מאַכן צוטריטלעך זײַנע 700 טאַשמע־רעקאָרדירונגען פֿון ייִדיש־קולטור אין שטאָט ניו־יאָרק. פֿון 2000 ביז 2013 איז ער געווען דער שטעל־פֿאַרטרעטער בײַם פֿאָרווערטס. ער איז דער מחבר פֿונעם ענגליש־שפּראַכיקן בוך „דאָס דעפֿינירן דאָס ייִדישע פֿאָלק: די ייִדישע פֿאָלקלאָריסטן אין פּוילן“ (2003). זינט 2010 פֿירט ער אָן מיט אַ בלאָג „דאָס ייִדישע ליד פֿון דער וואָך“ (https://yiddishsong.wordpress.com) וואָס שטעלט אַפֿער רעקאָרדירונגען פֿון זעלטענע ייִדישע פֿאָלקסלידער.



ד”ר צירל אסתּר קוזניץ

ד”ר צירל אסתּר קוזניץ

ד”ר צירל אסתּר קוזניץ איז דער אַסאָציִיִרטער פּראָפֿעסאָר פֿון געשיכטע און פֿאַרנעמט די קאַטעדרע פֿון ייִדישער געשיכטע און קולטור א״נ פּאַטרישאַ ראָס ווײַס 52׳ אין באַרד־קאַלעדזש, וווּ זי איז יאָרן לאַנג געװען דירעקטאָרשע פֿון דער פּראָגראַם פֿון ייִדישע לימודים. זי איז די מחברטע פֿונעם ענגליש־שפּראַכיקן בוך ייִוואָ און די אַנטוויקלונג פֿון דער מאָדערנער ייִדישער קולטור: וויסנשאַפֿט פֿאַרן ייִדישן פֿאָלק (2014). צירל האַלט אין פֿאָרשן די טעמע ייִדישע שטאָט־געשיכטע און די געשיכטע פֿון „ביליקע הײַזער“ געבױט פֿאַר אָרעמע ייִדן אין מיזרח־אייראָפּע. 

עליע פּאַלעווסקי

עליע פּאַלעווסקי

עליע פּאַלעווסקי איז דער אַקטיווער עמעריטירטער הויפּט־עקזעקוטיוו פֿון באַדינונגען פֿאַר עלטערע לײַט א״נ ריווער גאַרדענס, וואָס ער האָט אויפֿגעבויט אין דזשעקסאָנוויל, פֿל״ע. אַ קינד פֿון ייִדיש־רעדנדיקע פּאַרטיזאַנער אין די ווילנער וועלדער בשעת דער צווייטער וועלט־מלחמה, האָט ער געלערנט ייִדישע שפּראַך, ליטעראַטור און קולטור אינעם ייִדיש־אינסטיטוט (ווילנער אוניווערסיטעט), קווינסער קאַלעדזש (נ״י), דעם ניו־יאָרקער שטאָטישן אוניווערסיטעט, און די ניו־יאָרקער אַרבעטער־רינג־ און שלום־עליכם־שולן. ער האָט אויך געדינט ווי דער קולטור־דירעקטאָר אין קעמפּ המשך. 



ירמיהו אַהרן טאַוב

ירמיהו אַהרן טאַוב

ירמיהו אַהרן טאַוב איז אַ פּאָעט, פּראָזאַיִקער, און אַן איבערזעצער פֿון דער ייִדישער ליטעראַטור אויף ענגליש. ער איז דער מחבר פֿון צוויי ביכער שיינע ליטעראַטור און זעקס בענד פּאָעזיע, אַרײַנגערעכנט אַ מויז צווישן וואַקלדיקע וואָלקן-קראַצערס: געקליבענע ייִדישע לידער (2017). זײַנע איבערזעצונגען אויף ענגליש פֿון איידע מאַזעס דינה: אויטאָביאָגראַפֿישע דערציילונג (2022) און פֿרומע האַלפּערנס געבענטשטע הענט: דערציילונגען (2023) זײַנען לעצטנס אַרויס. נאָך וועגן אים אָט אָ דאָ: וועבזײַטל.

 

אַרעלע װישװאַנאַט

אַרעלע װישװאַנאַט

אַרעלע װישװאַנאַט איז אַ ליבהאָבער פֿון ייִדיש לשון און ליד. אַן איבערזעצער פֿון ביכער, איבער הויפּט פֿון ענגליש אויף ייִדיש, איז אַרעלע דער אויטאָריזירטער איבערזעצער פֿון דער פּאָפּולערער סעריע „הערי פּאָטער“ (harrypotter.olniansky.com). דערצו איז ער אויך אַ מוזיקער וואָס טרעט אויף אויף ייִדיש־אונטערנעמונגען, סײַ פֿאָרמעל סײַ אומפֿאָרמעל. אַרעלע אַרבעט אויפֿן פֿעלד פֿון אַנאַליז און סטראַטעגיע אין אַ ניו־יאָרקער טעכנאָלאָגיע־פֿירמע.



אָדם ווײַטמאַן

אָדם ווײַטמאַן

אָדם ווײַטמאַן, אַ ספּעציאַליסט אין שטאָטישער און פּראָיעקטן־פֿינאַנץ, איז אַן אינפֿראַסטרוקטור־בעל־יועץ אינעם ביוראָ פֿון טעכנישער הילף בײַם אַמעריקאַנער פֿינאַנץ־מיניסטעריום, און אַרסעט אויף פּראָיעקטן אין אוקראַיִנע און אינדיע. ער איז אויך אַ קינסטלער פֿון פּאַפּירשניטן, וואָס זײַן ווערק האָט מען שוין געזען סײַ אויף יוטוב סײַ אויף קאָפּאַקטלעך סײַ אין כּלערליי געדרוקטע מעדיע. אָדמס טעכטער און אייניקלעך רעדן אויך ייִדיש, און טראָגן ווײַטער זײן טיפֿע איבערגעגעבנקייט צום פֿאַרזיכערן דעם קיום פֿון דער שפּראַך.

 



אלי בענעדיקט

אלי בענעדיקט
פּראָגראַם־און ווערביר־דירעקטאָר

אלי בענעדיקט אָרגאַניזירט און פֿירט אָן מיט די פּראָגראַמען בײַ דער ייִדיש־ליגע און ברענגט דערבײַ אַרײַן אַ טעם פֿון דער הײַנטצײַטיקער ייִדישער קולטור אין אונדזער עולם איבער דער וועלט. ער איז אַ פֿאָרשער, קינסטלער און ייִדיש־קולטור־טוער. ער איז אויפֿגעוואַקסן אין אַ חסידישער קהילה אין ישׂראל, און געלערנט אין ישיבֿות און כּוללים. אלי איז אַ פֿרײַוויליקער אָנפֿירער פֿון „יונג־ייִדיש“ און דעם ייִדישן מוזיי אין תּל־אָבֿיבֿ, און באַטייליקט זיך אין דער פֿאָרש־גרופּע בײַם יוניווערסיטי־קאַלעדזש לאָנדאָן וואָס פֿאָרשט „חסידישע־אידיש“. 


יאַנקל סאַלאַנט

יאַנקל סאַלאַנט
קונסט־דירעקטאָר

יאַנקל סאַלאַנט איז דער ממונה איבערן וויזועלן פּנים פֿון דער ייִדיש־ליגע, איז דער גראַפֿישער דיזײַנער פֿון ס’רובֿ אירע פּובליקאַציעס און דינט ביז 2025 ווי איר וועבמײַסטער. ער איז דער איבערזעץ־רעדאַקטאָר פֿאַרן פֿאַרלאַג „ווײַסע ציג“ בײַם ייִדישן ביכער־צענטער און איז חוץ דעם געווען דער איבערזעץ־רעדאַקטאָר און איינער פֿון די איבערזעצערס פֿון דעם בוך אויפֿן שיידוועג (2023). יאַנקל ספּעציאַליזירט זיך אויך אין איבערזעצן האַנט־געשריבענע דאָקומענטן פֿון ייִדיש אויף ענגליש, שפּאַניש און איטאַליעניש. אַן אַסאָציִיִרטער רעדאַקטאָר פֿונעם אַרומנעמיק ייִדיש־ענגליש ווערטערבוך (2013),  איז ער געווען דער ביבליאָגראַפֿיע־רעדאַקטאָר און אַן איבערזעצער פֿון דער ענגליש־שפּראַכיקער „ייִוואָ־ענציקלאָפּעדיע פֿון די ייִדן אין מיזרח־אייראָפּע“ (2008).


ד״ר מרים טרין

ד״ר מרים טרין
שעף־
רעדאַקטאָרשע,
אויפֿן שוועל

ד״ר מרים טרין איז אַ לעקטאָרשע אין ייִדישער שפּראַך און ליטעראַטור בײַם העברעיִשן אוניווערסיטעט אין ירושלים. אַ געבוירענע אין פּוילן און דערצויגענע אין דײַטשלאַנד, האָט זי שוין געלערנט אין אינטענסיווע ייִדיש־פּראָגראַמען און ־וואַרשטאַטן אין תּל־אָבֿיבֿ, ניו־יאָרק, פּאַריז, טאָקיאָ, אָקספֿאָרד, שטראַסבורג, ווילנע, טאָראָנטע, באַלטימאָר, לאָס־אַנדזשעלעס און שטאָקהאָלם. אין 2018 האָבן זי מיט איר מאַן אליעזר ניבאָרסקי מיטגעשאַפֿן אין ישׂראל אַ נײַעם ייִדישן קולטור־צענטער, „יאָ“־ייִדיש־אָרט, וואָס אָרגאַניזירט אַלוועלטלעכע אַקטיוויטעטן סײַ אויפֿן אָרט סײַ אָנלײַן. זיי האָדעווען אויף זייערע פֿיר קינדער אין ייִדיש.